Vefþjóðviljinn 142. tbl. 17. árg.
Skuldaleiðréttingarsjóður!
Formaður Framsóknarflokksins var að átta sig á því, sem þurfti þó ekki doktorspróf til, að hrægammarnir vilja ekki endilega láta peninga af hendi eins og skot. Og um leið er búið að setja ákvæði um þennan nýja framsóknarsjóð í ríkisstjórnarsáttmála sem Sjálfstæðisflokkurinn á aðild að. Alveg um leið.
Ríkisstjórnin heldur þeim möguleika opnum að stofna sérstakan leiðréttingarsjóð til að ná markmiðum sínum.
Eru menn alveg vissir um að nú sé helst þörf á nýjum opinberum framsóknarsjóði sem véli um persónuleg fjármál fólks?
Íbúðalánasjóður Framsóknarflokksins hafði forgöngu um að fólk skuldsetti sig helst ekki minna en 90%. Sjóðurinn gerði sjálfan sig gjaldþrota í leiðinni og skattgreiðendur fengu tugmilljarða reikning og hafa ekki bitið úr nálinni.
En vissulega er það ein leið til að halda upp á 10 ára afmæli 90% lánanna að endurtaka mistökin.