H undrað ára er í dag maður sem auðgað hefur líf fjölmargra. Með einlægum og heiðarlegum frásögnum sínum af því sem hann hefur séð með eigin augum af lífi og verkum blaðamannsins geðfellda, Tinna, og samstarfsmanna hans, hefur Georges Prosper Remi minnt heimsbyggðina á það hverju drenglyndi, áræði og Loch Lomond viskí fá áorkað ef þau eru blönduð í réttum hlutföllum. Undir dulnefninu Hergé færði hann í letur og myndir margt af því helsta sem hefur á daga Tinna drifið undan farna áratugi, en óhætt er að segja að hann hafi ekki eingöngu róið í gráðið heldur þvert á móti barist þar sem mest þörf var á. Glæpamenn Chigago-borgar fengu að kenna á honum, hann tryggði stöðugleika í viðkvæmum heimshluta þegar hann bjargaði veldissprota Ottókars konungs undan Bordúríumönnum og steig fyrstur manna fæti á tunglið og ruddi þar með leiðina fyrir Neil Armstrong sem fylgdi í fótspor hans hálfum öðrum áratug síðar.
Ein mesta hættuför Tinna var til Sovétríkjanna þar sem hann komst að sláandi niðurstöðum, eins og Vefþjóðviljinn hefur áður sagt frá.
Hann varð meðal annars vitni að því þegar auðtrúa breskum vinstrimönnum voru sýndar verksmiðjur sem sagt var að gengju á fullum afköstum, öfugt við það sem haldið væri fram á Vesturlöndum. Þegar Tinni skoðaði þær hins vegar nánar sá hann að þar fór engin sérstök starfsemi fram en aðeins hafði verið búinn til reykur og hávaði á meðan einfeldningarnir stóðu og göptu. Eins og flestir vita nú þá voru hinir og þessir vestrænir vinstrimenn tíðir gestir í Sovétríkjunum og fóru síðan heim og sögðu glæsisögur af framgangi sósíalismans. En Tinni var ekki eins grænn og þeir og skyggndist undir yfirborðið, en slíkt virðist geta reynst ótrúlegasta og jafnvel besta fólki ofviða á öllum tímum. Tinni gerði fleira en fylgjast með vestrænum einfeldningum. Hann fylgdist með fundi þar sem öreigarnir fengu að kjósa. Sú kosning fór þannig fram að fyrst var kjósendum kynnt að í boði væru þrír listar og væri hinn fyrsti boðinn fram af Kommúnistaflokknum…
Því næst voru allir þeir sem væru andvígir þeim lista beðnir um að gefa sig fram…
… að þessu sinni reyndist það enginn vera og því var tilkynnt að Kommúnistaflokkurinn hefði verið kjörinn með öllum greiddum atkvæðum.
Það er hætt við því, að margt hefði farið betur í heiminum ef fleiri hefðu tekið mark á rannsóknum Tinna en upphöfnum frásögnum vestrænu inntellígensíunnar, sem var jafn snjöll í alþjóðamálum þá og hún er í dag.