Það er kunnara en frá þurfi að segja að ýmsir þingmenn fylkingarinnar hafa síður en svo ánægju ef því hve miklar vinsældir Jóhönnu Sigurðardóttur eru í samanburði við þá sjálfa. Jóhanna malaði Össur Skarphéðinsson í prófkjöri fyrir nokkrum vikum og mátti Össur heita heppinn að ná sæmilega líklegu þingsæti. Á heimasíðu fylkingarinnar er sagt frá fundi sem Össur Skarphéðinsson og Margrét Frímannsdóttir sóttu austur í Flóa í fyrradag. Segir svo frá: Í ræðu sinni fór Össur yfir tilurð Samfylkingarinnar og þær væntingar sem samfylkingarsinnar bera til hinnar nýju hreyfingar. Össur sagði m.a. að í kosningunum þann 8. maí væri í fyrsta skipti möguleiki á því að kona, og það vinstri sinnuð kona, Margrét Frímannsdóttir, gæti orðið forsætisráðherra Íslands.
Það er gaman að heyra að væntingar sem samfylkingarsinnar bera eru allt aðrar en þeir létu í ljósi í prófkjörinu þegar Jóhanna rótburstaði Össur. Hvar er vilji fólksins núna Jóhanna? Þetta er einnig athyglisverð söguskoðun. Fyrri réttum fjórum árum hafði Þjóðvaki flokkur Jóhönnu Sigurðardóttur margfalt fylgi á við þáverandi flokk Össurar Skarphéðinssonar Alþýðuflokkinn og einnig fyrrverandi flokk hans Alþýðubandalagið. Þá var allt eins líklegt að Jóhanna kæmist í þá aðstöðu að mynda ríkisstjórn. Það á semsé ekki aðeins að reyna að fela núverandi vinsældir Jóhönnu og gera lítið úr hennar hlut á allan hátt heldur er reynt að falsa söguna með afar sérstæðum hætti í sama tilgangi.
Í kosningabaráttunni er talsvert rætt um skuldasöfnun heimilanna. Hún virðist jafnvel koma stjórnmálamönnum á óvart. Jafnvel fyrrverandi félagsmálaráðherrum eins og Rannveigu Guðmundsdóttur og Jóhönnu Sigurðardóttur sem eiga þátt í því að hvetja fólk til skuldasöfnunar þegar það kaupir húsnæði. Vaxtabótakerfið hvetur nefnilega til skuldasöfnunar. Fólk sem á 2 milljónir króna og kaupir 7 milljón króna íbúð á auðvitað að taka 7 milljónir að láni og láta milljónirnar tvær á beit þar sem þær vaxa og dafna. Dæmi lítur nefnilega þannig út að fólk með meðaltekjur sem skuldar 7 milljónir greiðir ekki meiri vexti og verðbætur heldur en fólk sem skuldar 5 milljónir króna þegar tekið hefur verið tillit til vaxtabóta.