Vefþjóðviljinn 347. tbl. 18. árg.
Hvort gefa hinn marglastaði bílafloti Íslendinga eða framræst votlendi á Íslandi frá sér meiri gróðurhúsalofttegundir? Er það ekki örugglega einkabíllinn, það eiturspúandi óféti?
Á síðari hluta 20. aldar styrkti ríkið bændur úr Jarðræktarsjóði til að ræsa fram mýrar og annað votlendi. Þegar vatnið rennur úr jarðveginum fer af stað oxun á því kolefni sem safnast hefur upp í votlendinu og við það myndast gróðurhúsalofttegundir.
Össur Skarphéðinsson alþingismaður spurði umhverfisráðherra að því nýlega hver losun koltvísýrings (CO2-ígildi) væri frá framræstu landi.
Og svar umhverfisráðherra er sláandi, nánast ótrúlegt. Losunin úr votlendinu sem var ræst með stuðningi ríkisins, er brjálæðisleg. Hún er rúmlega níföld losunin frá öllum samgöngum á Íslandi.
Með því að moka ofan í tíunda hvern framræsluskurð á landinu og endurheimta votlendið að fullu mætti því draga úr útblæstri gróðurhúsalofttegunda sem nemur öllum bílaflota landsmanna.
Brennisteinninn sem Holuhraun hefur sent út í loftið undanfarið samsvarar brennisteinsútblæstri frá bílaflota Íslendinga í nokkrar milljónir ár. Framræsta landið gefur frá sér nífalt meira af gróðurhúsalofttegundum (koltvísýringi) en bílaflotinn.
Eru ekki örugglega allir alltaf tilbúnir í bíllausa daginn?
