Vefþjóðviljinn 133. tbl. 19. árg.
Eftir því var óskað hér í gær að fleiri stjórnmálamenn þyrðu að tala um hagsmuni hins vinnandi manns, að hann fengi launin sín að mestu leyti í vasann og gæti staðið á eigin fótum.
David Cameron forsætisráðherra Breta hafði einmitt viðrað slík sjónarmið undanfarna daga.
Morgunblaðið sagði þá frá því í gærkvöldi að við umræður í borgarstjórn um ársreikning Reykjavíkurborgar fyrir árið 2014 hefði Kjartan Magnússon borgarfulltrúi Sjálfstæðisflokksins tekið til máls.
Kjartan sagði borgarstjórnarmeirihluti Samfylkingar, Bjartrar framtíðar, Pírata og Vinstri grænna bera ábyrgð á því að skattheimta á Reykvíkinga væri í hámarki. Útsvarsprósenta væri í lögbundnu hámarki og fasteignaskattar á fólk og fyrirtæki væru að sama skapi mjög háir. Þessar háu skattgreiðslur skertu lífskjör almennings. Sagði hann háa skatta ekki vera sjálfsagða. Þannig væru á höfuðborgarsvæðinu rekin fyrirmyndarsveitarfélög án þess að íbúar þeirra væru skattpíndir.
Morgunblaðið hafði jafnframt eftir Kjartani:
Fjármál Reykjavíkurborgar væru byggð á háum sköttum og lausatökum í fjármálum og bæru af þeim sökum mjög ákveðin einkenni sósíalískra stjórnarhátta.
Það er afskaplega mikilvægt að kjörnir fulltrúar gleymi ekki þessum grundvallaratriðum þótt kerfið reyni að kaffæra þá í þvargi um tæknilegar útfærslur á kerfinu sjálfu.