Vefþjóðviljinn 290. tbl. 17. árg.
Samstaða íslenskra vinstri manna og múslímaklerka eykst jafnt og þétt í helstu málum enda hefur Halla Gunnarsdóttir leitt að því fræðileg rök að aðeins sé stigsmunur á klerkaveldinu og vestrænu lýðræði.
Bæði klerkarnir og íslenskir vinstri menn eru til að mynda mjög uppteknir af því að konur hylji líkama sinn. Eru ófá boðin og bönnin um þau efni bæði frá klerkunum og Alþingi og lögregluvaldi beitt á báðum vígstöðvum ef einhvers staðar sést manneskja bera sig við rangar aðstæður. Nýjasta framlag íslenskra vinstri manna er tillaga á Alþingi um að yfirvöld saumi nú betur að „kampavínsstöðum“.
Baráttan gegn einkabílismanum, öðru nafni ferðafrelsi fólks, er einnig víða að ná hámarki. Í fréttum var nýlega sagt frá því að múslimaklerkar vilji banna helmingi mannkyns að aka um á bíl því það fari illa með eggjastokka og mjaðmagrind. Bætist það böl á langan lista yfir þann óskunda sem einkabíllinn gefur gert bæði umhverfi fólks og innyflum. Hér á landi reyna menn hins vegar að talibanna fólki að nota bíla með því að útiloka efnaminni helming manna með svæsnum vörugjöldum og virðisaukaskatti á bæði bílana sjálfa, eldsneyti og varahluti.
Einhvern tímann voru þessir skattar nefndir lúxusskattar því menn þurftu að lifa í lúxus til að hafa efni á að greiða þá. En nú eru þeir að hluta sagðir í þágu umhverfisins. Það segja umhverfissinnar sem hafa jafnframt áhyggjur af fækkandi sæðisfrumum vegna mengunar um leið og þeir leita ráða til að stöðva offjölgun mannkyns.