Langri leit Vefþjóðviljans að samfélagi, þar sem Kolbrún Halldórsdóttir, Karl Sigurbjörnsson og aðrir heimsósómapredikarar geta fundið frið, er á enda. Samfélagið þar sem ósóminn hefur verið gerður útlægur er bærinn Pound í Virginiaríki í Bandaríkjunum. Þar hefur dans verið bannaður, enda vekur hann upp lostafullar tilfinningar, eins og ummæli starfsbróður Karls í Pound bera með sér. Sá segist ekki sjá fyrir sér að sá tími muni nokkru sinni renna upp að dans verði samþykktur. Flyttu Karl og Kolbrún til Pound þyrftu þau ekki að tala eins og herra Karl gerði um helgina þar sem hann lýsti þeirri skoðun sinni að næturlífið í Reykjavík beri vitni um virðingarleysi, siðblindu og græðgi. Að ekki sé talað um klámið, kvenfyrirlitninguna og niðurlæginguna sem næturrápi Reykvíkinga fylgir að sögn biskups. Með því að banna bara allan dans og dill væri hægt að koma í veg fyrir allan þennan ósóma, en fyrst stemmningin fyrir slíku banni virðist ekki vera mikil í Reykjavík er ekki annað að gera fyrir þá sem eru líkt þenkjandi og þau skötuhjú en flytja til Pound.
Með samskoti í miðborg Reykjavíkur næstkomandi föstudags- og laugardagskvöld eru góðar líkur til að hægt verði að safna fyrir miða aðra leiðina til Pound fyrir þá sem geta ekki unnt öðrum þess að haga lífi sínu eftir eigin höfði.