Össur Skarphéðinsson á nú í harðri baráttu við Magnús bróður sinn og Hjörleif Guttormsson um nafnbótina ofstækisfyllsti umhverfisverndarsinninn á Íslandi. Í DV á laugardaginn ritar Össur grein sem einkennist af öllu því versta sem umhverfisverndarsinnar á borð við grænfriðunga og samherja Pauls Watsons hafa haft fram að færa. Greinin ber yfirskriftina Paradísarmissir og er full af fullyrðingum um að hitastig andsrúmsloftsins fari hækkandi og að óveður, sníkjudýr, sjúkdómar, skordýraplágur, ískaldir straumar, sjóðheitar eyðimerkur og flóð plagi okkur meira en áður.
Össuri til fróðleiks má geta þess að hiti andrúmslofts hefur ekki hækkað meira undangengna öld en búast má við sem náttúrulegri sveiflu eða um 0,5°C. Jafnvel þeir vísindamenn sem ennþá spá hækkun hita í framtíðinni viðurkenna að þessi hækkun er of lítil til að hún sé marktæk. Stærstur hluti þessarar hækkunar átti sér líka stað fyrir 1940 þ.e. áður en útblástur gróðurhúsalofttegunda af manna völdum jókst til muna. Mælingar úr gervitunglum NASA frá 1979 sýna enga hækkun hita í andrúmsloftinu. Öll spálíkön um hækkanir á hita hafa brugðist. Þar með talið líkanið sem Ríó samkomulagið um takmörkun útblásturs gróðurhúsalofttegunda var byggt á. Það væri líka gaman að vita hvað Össur treystir veðurspám almennt langt fram í tímann. Ef marka má skrif hans i DV um helgina er það lágmark 100 ár.
Í rannsókn sem Accu veðurstofan hefur gert kemur fram að hvorki fellibylir né annar veðurofsi sé tíðari nú en fyrir 50 eða 100 árum. Ástæðan fyrir því að menn halda öðru fram er að fréttir eru tíðari af óveðri. Þegar Össur horfir á fréttir af óveðri í fjarlægum heimshluta í fyrsta sinn haldur hann sjálfsagt að þar hafi aldrei verið óveður áður! Bara af því að við fengum ekki fréttir af því. Bæði veðurathuganir og fréttaflutningur hefur breyst gríðarlega á undanförnum árum. Þess vegna fáum við nú nær undantekningarlaust fréttir af óveðri í fjarlægum heimshlutum. Fólk býr og eyðir sumarleyfum líka á fleiri og varhugaverðari stöðum en áður. Eignatjón vegna óveðurs hefur því aukist í Bandaríkjunum undafarna áratugi vegna aukinnar byggðar en ekki vegna tíðara óveðurs. Vegna betra veðureftirlits hefur þeim sem látast vegna veðurs hins vegar fækkað hin síðari ár.
Íslendingar hafa fengið að kenna á því á undanförnum árum hvernig óvandaður málflutningur umhverfisverndarsinna getur ráðið úrslitum um hvort náttúran er nýtt á skynsamlegan hátt. Vera má að Magnús og Össur Skarphéðinssynir séu ánægðir með að þessi málflutningur hafi komið í veg fyrir að við nýtum selinn og hvalinn. En sú staðreynd mun vonandi verða til þess að fólk geldur varhug við öðrum boðskap þeirra í umhverfismálum.
Halldór Ásgrímsson lýsti því yfir um helgina að næstu borgarstjórnarkosningar yrðu þær síðustu sem Framsóknarflokkurinn veitti R-listanum stuðning sinn í. Þar fór það.