Vefþjóðviljinn 348. tbl. 15. árg.
Síðustu daga hafa vegfarendur hjá útrásarhöllinni helst haldið að Evrópumótið í ljósritun væri hafið þar innandyra. Búið er að auka lýsinguna í húsinu og hún flöktir eins og skíma frá ljósritunarvél á fullum dampi. Samkvæmt fréttum er þó um að ræða sérhannað ljóslistaverk, sem er án efa mjög mikið afrek séð af sjónarhóli þeirra sem til þekkja í heimi æðri lista.
Þetta framtak verður seint fullþakkað og sennilega aldrei fullgreitt.
Fyrir nokkrum misserum ákvað Reykjavíkurborg hins vegar að lækka orkukostnað sinn með því að draga verulega úr götulýsingu í bænum.
Öryggi vegfarenda er ofmetið fyrirbæri.
Vegfarendur veita því einnig athygli að samkvæmt tilkynningum á vegaskiltum eru jafnan um 495 bílastæði laus undir útrásarbautanum. Enginn vill geyma bílinn sinn í menningarbílskúr borgarstjórnar. Á sama tíma neyta borgaryfirvöld allra ráða til að fækka bílastæðum í íbúahverfum og við verslunargötur þar sem þeirra er raunveruleg þörf. Í samræmi við þessa stefnu íhuga borgaryfirvöld að falla frá hugmyndum um bílastæðahús við hina væntanlegu gríðarlegu sjúkrahúsbyggingu ríkisins utan í Þingholtunum og reisa frekar veglegt skýli fyrir reiðhjól.
Þarna er vissulega lag því margir viðskiptavinir sjúkrahúsa eru nú þegar á hjólum, þótt handknúin séu.