Vefþjóðviljinn 346. tbl. 15. árg.
Rétt eina ferðina gerir Fréttablaðið viðhorfskönnun um ESB með spurningunni:
Hvort myndir þú heldur kjósa: 1) Að draga til baka umsókn um aðild að Evrópusambandinu, eða 2) Að ljúka aðildarviðræðum við Evrópusambandið og halda þjóðaratkvæðagreiðslu um aðildarsamninginn?
Fréttablaðið leggur mikla áherslu á að gera kannanir um þetta efni því fyrir nokkrum dögum gerði Capacent könnun fyrir ESB-sinna um sama efni þar sem spurt var með svipuðum hætti og Fréttablaðið gerir. Á sama tíma gerði MMR könnun um sama mál fyrir Andríki þar sem þjóðaratkvæðagreiðslu var ekki hengt við annan kostinn.
Fljótt á litið virtust niðurstöður MMR og Capacent stangast á.
Ef rýnt var í niðurstöður voru þær hins vegar í meginatriðum þær sömu. Um helmingur svarenda vildi draga umsóknina til baka í báðum könnunum, 50% í könnun MMR og 47% í könnun Capacent.
Það er hins vegar vart hægt að bera saman hina hliðina á peningnum þar sem könnun Capacent var skilyrt – boðið var upp á þjóðaratkvæðagreiðslu handa þeim sem vilja halda aðildarviðræðum áfram.
Niðurstöður Fréttablaðsins virðast hins vegar stangast verulega á við niðurstöður MMR og Capacent því aðeins 35% vilja samkvæmt könnun blaðsins slíta viðræðunum.