| Við vorum að taka ákvörðun um það, ég veit ekki hve endanleg hún er, að reisa hérna tónlistarhús og það sameinast allir um að setja þar í tugi milljarða og þetta fer í gegn nánast umræðulaust. Ef að Reykvíkingar þurfa að bíða lengur en 20 sekúndur á rauðu ljósi er rokið til og byggð mislæg gatnamót. En síðan látum við það gerast að fólk er látið búa við skilyrði sem eru ekki í samræmi við grunnmannréttindi og að sjálfsögðu á að grípa þegar í stað til aðgerða til að bæta úr þessu. |
| – Ögmundur Jónasson alþingismaður í Kastljósi Ríkissjónvarpsins í gærkvöldi. |
Ö
 |
| Vinstri grænir í borgarstjórn taka opinberar glæsihallir fram yfir „grunnmannréttindi“. Nú ætla þeir að yfirtrompa íburðinn og prjálið í Orkuveituhúsinu með tónlistarhúsi. |
gmundur Jónasson alþingismaður vinstri grænna vakti máls á því í Kastljósi Ríkissjónvarpsins í gærkvöldi að á sama tíma og ýmis velferðarmál væru látin reka á reiðanum væri verið að ráðast í byggingu tónlistarhúss fyrir tugi milljarða króna.
Umræðan spratt af því að starfsmenn Kastljóssins hafa verið iðnir við það síðustu daga að sýna áhorfendum dæmi um það sem betur mætti fara í velferðarmálum og að aðstoð við þá sem raunverulega þurfa á aðstoð að halda sé víða af skornum skammti. Mikil þrengsli og mannekla eru til að mynda á hjúkrunarheimili í eigu ríkisins.
Það sem vekur furðu Vefþjóðviljans er að borgarfulltrúar vinstri grænna skuli ekki hafa sett hnefann í borðið og krafist þess að áður en milljörðum verður veitt úr ríkissjóði og borgarsjóði í íburðarmikið tónlistarhús skuli komið á móts við „grunnmannréttindi“ fólks eins og Ögmundur kallar það. Ögmundur sjálfur lagði það beinlínis til í Kastljósinu að verkefni eins og tónlistarhúsið ættu einfaldlega að bíða þar til úr rættist í velferðarmálum.
Borgarstjórn Reykjavíkur er einn af höfuðpörunum í tónlistarhússmálinu. Hvers vegna hafa Árni Þór Sigurðsson, Björk Vilhelmsdóttir og Katrín Jakobsdóttir fulltrúar vinstri grænna í borgarstjórn á þessu kjörtímabili ekki tekið þessari áskorun þingmannsins og stöðvað þá menn sem ætla sér að reisa mjög dýrt tónlistarhús á dýrasta stað á landinu á kostnað skattgreiðenda? Þykir þeim ekki nóg að hafa hús Orkuveitu Reykjavíkur á Bæjarhálsi á afrekaskrá sinni? Eru fleiri glæsihallir ofar á óskalista vinstri grænna en „grunnmannréttindi“?
Er það bara í Kastljósinu sem vinstri grænir eru með „grunnmannréttindi“ á hraðbergi?