Eins og Vefþjóðviljinn hefur stundum sagt þá skipta þjóðaratkvæðagreiðslur innan Evrópusambandsins litlu máli því aldrei er bakkað með nokkurn hlut, bara kosið aftur eftir að hlutunum er raðað upp á nýtt þannig að í raun er sama gamla draslið notað áfram. Í nýjasta fréttabréfi Evrópusamtakanna er vitnað í ræðu sem Jón Baldvin Hannibalsson hélt á aðalfundi samtakanna eftir að hann var kjörinn „Evrópumaður ársins“ af samtökunum.
| Ef eitthvað ríki fellir stjórnarskrána, hvað gerist þá? Nú, þá taka gömlu sáttmálarnir gildi, en það gerist ekki mikið meira. Stjórnarskráin minnir mig á að konur eru alltaf svo mikið fyrir tiltekt og að hafa allt í röð og reglu á sínu heimili. Þetta er svona til að safna saman því sem á að standa á einu blaði, en það skiptir engu máli um framtíð Evrópusambandsins í raun og veru hvort öll löndin samþykkja eða ekki. Þetta er leiðinlegt plagg og allt of langt, en það skiptir engum sköpum. |
Það er sagt að stjórnmál víki sífellt meira fyrir viðskiptamálum. Það er nokkuð til í því. Til að vekja athygli almennings á sér hefur formannsframboð Össurar Skarphéðinssonar í Samfylkingunni því sent frá sér milliuppgjör. Uppgjörið er gott, hagnaður nokkur og arðsemi eigin fjárframlags Össurar vel yfir 50% að teknu tilliti til dóttur- og hlutdeildarfélaga á borð við Músavinafélagið og Álfaskólann. Þegar tekið er tillit til þessarar góðu afkomu og þeirrar klassísku hagfræðikenningar vinstri manna að eins gróði sé annars tap hlýtur að vera von á afkomuviðvörun frá framboði Ingibjargar Sólrúnar Gísladóttur.
Vefþjóðviljinn rifjaði það síðast upp fyrir viku hvernig Ingibjörg Sólrún Gísladóttir, frambjóðandi Kvennalistans í þingkosningum 1991, varpaði helsta stefnumáli listans, að vera andvígur álverum, fyrir róða á sjálfa kosninganóttina. Ástæðan var að hún eygði möguleika á sæti í ríkisstjórn léti hún þetta meginmál framboðsins ekki flækjast fyrir.
Þrátt fyrir þessi sinnaskipti í beinni sjónvarpsútsendingu á kosninganótt þegar ráðherrastólarnir voru farnir að freista hefur Ingibjörg ekki alveg sagt skilið við gömlu stefnu Kvennalistans því á fundi með stuðningsmönnum sínum í fyrrakvöld vék hún að álversmálum með eftirfarandi orðum:
| Hún [ríkisstjórnin] er föst í atvinnustefnu gærdagsins og sér enga aðra kosti en stóriðju sem byggir á stórvirkjunum í stað þess að skjóta stoðum undir fjölbreytta atvinnustarfsemi um land allt. |
Þegar hin gamla stefna Kvennalistans og orð Ingibjargar í fyrrakvöld eru höfð í huga kemur forsíða blaðs Samfylkingarinnar fyrir síðustu þingkosningar einkar vel út.
 |
| Frambjóðendur Samfylkingarinnar segja ál fyrir ljósmyndarann fyrir austan. |