 |
| Umsjónarmenn Spegilsins: Til vinstri er Friðrik Páll Jónsson og vinstra megin við hann er Hjálmar Sveinsson. |
Bent var á það hér fyrir fáeinum dögum að forsvarsmenn Spegilsins í Ríkisútvarpinu segðust jafnan gæta þess að láta koma fram að fleiri en ein hlið sé á hverju máli. Hlustendur Spegilsins vita að með þessu er átt við að báðar vinstri hliðar málsins séu ævinlega dregnar fram, til dæmis með því að tala frekar við tvo vinstri menn en einn ef þess er kostur. Og þá er ekki síðra að tala við þrjá talsmenn vinstri aflanna en tvo, líkt og gerðist í gær þegar Spegillinn tók sig til og fjallaði um fjárlögin. Faglegt hlutleysi umfjöllunarinnar fólst í því að rætt var við þrjá fulltrúa stjórnarandstöðunnar í fjárlaganefnd, en engan talsmann stjórnarinnar. Með þessu tókst Speglinum að draga fram raunsanna mynd af fjárlagafrumvarpinu þannig að hlustendur gætu áttað sig á kostum þess og göllum.
Svo ótrúlega vildi til að fulltrúar stjórnarandstöðunnar í fjárlaganefnd sáu fjárlagafrumvarpinu flest til foráttu og mun hafa komið mjög á stjórnendur Spegilsins þegar í ljós kom að allar vinstri hliðar málsins skyldu vera svo sláandi líkar. Alveg óvænt sáu stjórnarandstæðingarnir fjársveltar ríkisstofnanir, svikna samninga og of lága skatta hvert sem litið varð.
Fréttaskýringaþáttur vinstri manna stóð vitaskuld einnig undir væntingum þeirra síðast liðinn þriðjudag, en þá máttu áheyrendur hlýða á ýtarlega frásögn af grein um Kárahnjúkavirkjun í breska dagblaðinu Guardian. Ef marka má pistlahöfundinn eru íslensk stjórnvöld átalin harðlega – með tilheyrandi áherslu á orðið harðlega – fyrir að ætla sér að spilla náttúru landsins. Eftir frásögnina, þar sem málið var rifjað upp að hætti hússins, spurði pistlahöfundur hvað erlendum blaðamanni kæmu umhverfismál hér á landi við. Hann svaraði spurningunni hikstalaust og sjálfur með því að blaðamanninum kæmi þetta við vegna hnattrænnar umhverfisvitundar.
En við svo búið mátti ekki standa, því báðar – eða öllu heldur allar – hliðar málsins urðu að fá að njóta sín. Til að svo mætti verða ræddi pistlahöfundur góða stund við tvo andstæðinga virkjunar við Kárahnjúka og tókst að toga upp úr þeim flest helstu sjónarmið virkjanaandstæðinga. Pistlahöfundur lét hins vegar eiga sig að ræða við stuðningsmenn virkjunar, enda gætu sjónarmið þeirra varla orðið til nokkurs gagns í umræðunni.