Mikil reiði er nú uppi vegna prófkjörsúrslita Sjálfstæðisflokksins í suðurkjördæmi og suðvesturkjördæmi. Nokkur flokksfélög hafa krafist þess að úrslitunum verði breytt og samfélagsmiðlar loga.
Strax í gærkvöldi var ljóst að hverju stefndi. Niðurstöður suðvesturkjördæmis komu snemma og þær voru sláandi. Bjarni var efstur, Jón annar, Óli Björn þriðji, Vilhjálmur fjórði og Bryndís fimmta. Fjórir af fimm efstu heita einu nafni en aðeins einn af fimm er með tvö nöfn. Og hann verður að gera sér þriðja sæti að góðu.
Neyðarráð Landssambands tvínefndra kom saman á neyðarfundi í nótt og lýsti því yfir að þessi listi yrði aldrei samþykktur. Formaður Landssambandsins, Hrólfur Snjólfur Kólfsson, sagði að tvínefndir myndu ekki sitja þegjandi undir þessu, ekki síst þar sem bæði formaður og varaformaður flokksins, Bjarni og Ólöf, eru einnefndir. Væri nú önnur öldin en þegar Geir Hilmar og Þorgerður Katrín stýrðu flokknum, en þá var einmitt mynduð ríkisstjórn með Samfylkingunni þar sem Ingibjörg Sólrún og Ágúst Ólafur voru formaður og varaformaður.
Fram kom í ályktun Landssambandsins að prófkjörsniðurstöðurnar væru svipað áfall og þegar valinn var nýr innanríkisráðherra. Þá hefði tvínefnd, Hanna Birna, látið af embætti og völ verið á mörgum hæfum tvínefndum í þingflokki Sjálfstæðisflokksins. Engu að síður hefði verið ákveðið að leita út fyrir þingflokkinn og fundin einnefnd, Ólöf. Þetta hefði sýnt raunverulegan hug flokksforystunnar til tvínefndra.
En kvöldið átti enn eftir að versna. Í suðurkjördæmi varð Páll efstur, Ásmundur annar og Vilhjálmur þriðji. Fyrsti tvínefndi frambjóðandinn kom í fjórða sætinu. Ætlar flokkurinn að bera þetta á borð fyrir tvínefnda í kosningunum? Veit flokkurinn ekki hvaða hlutfall tvínefndra er meðal landsmanna?
En tvínefndir eru ekki þeir einu sem eru reiðir. Þeir sem heita nafni sem byrjar á sérhljóða báru skarðan hlut frá borði. Bjarni, Jón, Óli, Vilhjálmur, Bryndís og Karen í suðvesturkjördæmi. Einn sérhljóðamaður af sex efstu og þessi eini heitir svo öðru nafni sem ekki hefst á sérhljóða sem vekur auðvitað tortryggni. Og í suðurkjördæmi urðu efst Páll, Ásmundur, Vilhjálmur og Ragnheiður. Einn sérhljóðamaður af fjórum. Getur ekki einhver sagt þessum flokki að það sé komið árið 2016?
Auðvitað verður að breyta prófkjörsniðurstöðunum þegar kjósendur kjósa vitlaust. Þetta vita aðrir flokkar. Þar gildir sú regla að ef efstu frambjóðendur eru ekki af réttum aldri, réttu kyni eða nógu miklir vinir Birgittu þá er niðurstöðunum breytt eða kosið aftur. Þannig virkar lýðræðið.
Vita menn ekki hvaða ár er núna?