Ríkisstjórn Pírata, VG og Samfylkingar er nú líklegasta niðurstaða þingkosninganna sem fram fara 28. október – ef marka má kannanir. Hér væri komin ríkisstjórn svipuð þeirri vinstri stjórn sem fór með völd á árunum 2009 – 2013 og lagði mesta áherslu á að hækka skatta á almenning, eyðileggja stjórnarskrá lýðveldisins, friðþægja erlenda kröfuhafa bankanna og leggja Ísland inn í Evrópusambandið.
Slík umskipti í ríkisstjórn nú væru veruleg tíðindi í landi þar sem svo margt hefur gengið mönnum í haginn frá því vinstri stjórnin fór loks frá völdum árið 2013. Atvinnuleysi er lítið, verðbólga lág, vextir á niðurleið, kaupmáttur eykst hratt, afgangur er á ríkissjóði og skuldir hans greiddar jafnt og þétt niður og gott jafnvægi er í viðskiptum við útlönd.
Þessi góða staða hefur gefið mönnum færi á að auka mjög við framlög til heilbrigðismála og fleiri velferðarmála undanfarin ár.
Um leið hafa ýmsir skattar hafa verið lækkaðir.
- Neðra þrep tekjuskatts einstaklinga lækkað.
- Milli þrep tekjuskatts afnumið. Skattur á tekjur á bilinu 230 – 780 þúsund lækkaði þar með úr 40,3% í 36,9%.
- Almenn vörugjöld felld niður.
- Almenna þrep virðisaukaskatts lækkað úr 25,5% í 24%.
- Tollar felldir niður af flestum vörum að frátöldum búvörum.
- Frítekjumark fjármagnstekna hækkað.
- Frítekjumark húsaleigutekna hækkað (greiddur skattur af 50% í stað 70% tekna).
- Tryggingagjald lækkað úr 7,69% í 6,85%.
- Eignarskattar lagðir niður með brotfalli auðlegðarskatts.
- Stimpilgjöld af fyrstu íbúð felld niður.
- Nýting séreignasparnaðar vegna íbúðakaupa og greiðslu skulda gerð skattfrjáls.
Ljóst má vera að ríkisstjórn VG, Pírata og Samfylkingar hefði engan áhuga á skattalækkunum enda hafa flokkarnir engar áætlanir um slíkt. Forystuflokkurinn í slíkri stjórn, VG, hefur þvert á móti lagt fram skriflegar tillögur við afgreiðslu ríkisfjármálaáætlunar um að hækka skatta um eina milljón króna á hvert mannsbarn í landinu á kjörtímabilinu sem fram undan er.
Vinstri is coming.